Plantun de Prouvènço

Pèr coumpara dos planto d'encò nostre

Hypochaeris maculata & Cyperus esculentus

Hypochaeris maculata

Asteraceae Compositae

Noms en français : Porcelle à feuilles tachées, Porcelle tachée.

Descripcioun :
Aquest engraisso-porc èi puléu uno planto de mountagno. Ei forto, bourrihudo, la cambo, ramificado, porto quàuqui fueio e fin qu'à 4 flour coumpausado. La rouseto de fueio èi souvènt, mai pas toujour, tacado de vióulet. Hypochaeris uniflora èi pas jamai ramificado e pas tacado.

Usanço :
Coume soun cousin l'engraisso-porc, aquest Hypochaeris se pòu manja en ensalado o cue.

Port : Grando erbo
Taio : 15 à 80 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Hypochaeris
Famiho : Asteraceae
Famiho classico : Compositae
Tribu : Cichorieae

Coulour de la flour : Jauno
Petalo : >6
Ø (o loungour) enflourejado : 3 à 4 cm
Flourido : Printèms - Estiéu

Sòu : Si
Autour basso e auto : Pancaro entresigna
Aparado : Noun
Remarco : Ensalado champanello
Jun à juliet

Liò : Tepiero - Esclargido - Champino - Terraire safrous
Estànci : Subremediterran à Subaupen
Couroulougi : Éurasiatico
Ref. sc. : Hypochaeris maculata L., 1753

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.